Það eru til tvenns konar greiðslukort. Þau heita debetkort og kreditkort. Og ekki má gleyma Vaxtalínukortinu sem er fullvaxið debetkort fyrir krakka sem eru 12 ára og eldri. Þeir sem nota debetkort verða að eiga peninga í bankanum, því þegar debetkort er notað er í rauninni verið að nota þá peninga sem geymdir eru á bankareikningnum. Það er hægt að nota debetkort í búðum, bönkum og hraðbönkum, bæði á Íslandi og í útlöndum.

Kreditkort eru frábrugðin debetkortum á þann hátt að þeir sem nota þau fá lánað fyrir því sem þeir kaupa. Það er hægt að borga með kreditkortum í búðum og taka út peninga í hraðbönkum. Þannig má segja að þeir sem nota kreditkort séu að eyða fyrirfram eða áður en þeir eignast peninga til að borga fyrir það sem þeir kaupa. Aldurstakmark til að fá kreditkort er 18 ár.

Ef þú ert orðinn 12 ára getur þú fengið Vaxtalínukort og hægt er að velja á milli debetkorts eða hraðbankakorts. Bæði kortin er hægt að nota til að taka út peninga hjá gjaldkerum í bönkum og í hraðbönkum bæði heima og erlendis. Debetkortið er einnig hægt að nota til þess að greiða fyrir vörur í verslunum. Það er góð hugmynd að fá mömmu og pabba til að leggja vasapeningana þína beint inn á Vaxtalínureikninginn þinn.