Halló, Halló. Stína símalína hér. Ég veit allt sem ég þarf að vita um banka. Bankar hafa það frábæra hlutverk að geyma peninga og aðra fjármuni. Ég segi bara: Þeir sem vilja geyma peningana sína á öruggum stað, þar sem Glanni glæpur getur ekki stolið þeim, ættu að leggja þá inn í banka.

Sá sem geymir peningana sína í bankanum fær borgað fyrir að geyma þá þar. Ég þekki fólk sem hefur stórgrætt á því að geyma peningana sína í bankanum allan ársins hring. Bankinn lánar líka fólki peninga. Það eru sumir sem eiga erfitt með að spara og fá þess vegna lánaða peninga, en þeir þurfa líka að borga fyrir að nota þá peninga. Það er kallað að borga vexti af láni. Ég þekki þetta allt saman!

Ég get sagt margt annað um banka. Orðið banki er dregið af ítalska orðinu “banca”, sem þýðir eiginlega bekkur. Í gamla daga var nefnilega bekkur á markaðstorginu þar sem peningum var skipt. Þetta er náttúrulega alveg ótrúlega gamaldags. Ég hefði sko ekki viljað vinna þar. Fyrsti bankinn, sem líkist þeim sem við þekkjum, var stofnaður í Feneyjum á Ítalíu árið 1587.